سني اوره‌ك‌لرده گؤروره‌م

89 اينجي ايلين مرداد آيي، استاد حميد آرش آزاد، 62 ياشدا، اول گؤزه‌ل معلّم- شاعير وقت‌سيز اولاراق حياتين دييشركن، بيزي و ادبيّات دونياميزي، آجي كؤچمه‌سيله، كديرلنديردي.

آمما نئيله‌ماق:

سالدين مني آتشه هِيْ، نارا هِيْ،

گؤزوم آغلار، ديليم چَكَر نَعره هِيْ.

«عاشيق عَلَسكر»

لازيم و ضروري چاقلاردا، گؤروشرديق، دانيشارديق اوندان بوندان، اوردان، بوردان، دردلرشرديق. دييرديلر:

آرش دئيير: بيرجه گولمدي اوزوم

دونيادا بير خوش گون گؤرمه‌ييب گؤزوم

سيزه تكجه بودور ديلگيم، سؤزوم:

مني ده بير يادا سالين، آدوستلار.

استاد حميد آرش آزاد توركجه و فارسجا شعرلرينده سياستي آزجا تومارلييه- تومارلييه آزجا! آلتدان- آلتادان طنزين گوجونه، جامعه‌نين چيركين يارالارين و انسانيّت يوللاريني گؤزه‌ل و كسگين فورمالارينان آينايا ساليب گوستره‌ردي. و بونا اَن استادليق و مهارت لازيمدي. نييه‌كي سياسته توخونماق و آري يوواسينا چوپ اوزاتماق بو زامانادا چتين و به قول رحمتيك «عمران صلاحي» اودولا اويناماقدير؛ بونا گوره آرتيق دوشونجه (درك) طلب ائدر. آمما «آزاد» اوستاكاريدي بيلردي نه دئسين، نه يازسين، نئجه گولدورسون و نئجه گولدوره- گولدوره فيكيره انسانلاري سالسين. بو استادين ان مهّم فلسفه‌سيدور و بو مهّم هنر ساتيرا (Satira) گوجو ايله اولا بيلر.

ساتيرا كي طنزه آذربايجان ادبيّاتيندا معروف اولوب بيزيم ئولكه‌ميزده اسكي بير پديده سائيلار. ميرزه علي‌اكبر صابيردن توت گه‌ل بويانا. ميرزه علي معجز، استاد يالقيز، استاد سخامهر، استاد ميرزا (حسين شهرك)، نجّار اوغلو، ساپلاق و استاد ماراغلي كريمي و آيريلاري طنز هنرايله ياتميشلارين چوخلارين غفلت يوخوسوندان آييديبلار. (البتّه ئولولريله ايشيم يوخ!). يئري وار كي دييم استاد حميد آرش آزاد ان نهنگ اول شاعيرلرين بايراقچيسيدي.

استادي ايلك دفعه‌ حسين آغانين خورشيد چايخاناسيندا كي طالقاني خياوانينين قارشيندا اولاردي گؤرموشدوم. سونرالار باغدا- باغاتدا، دارغدا، كيتاب- خانالاردا و... گؤره‌رديم. استاد گؤزه‌ل- گؤزه‌ل، جانلي شعرلرين اوخوياركن، منيم‌ده شعرلريمه حوصله ايله قولاق آساردي. هاردا مني گؤرسايدي دئيرديكي: - آداش! هله «گَوَن» شعرينين چئويرميشين اوخو گؤراق!

(گون شعري دكتر شفيعي كدكني دندي). منده باشلارديم:

هاراسن قوچاق قاچئرسان

قورو اوت سؤروشدو يئلده‌ن

....

قوتارماق هامان استاد باشلاردي:

من جهاندان گئده‌ر اوْلسام، گئنه ناميم قالاجاق

«دوغروله‌ر بيرگون عدالت» دئديم، «آللرم كاميمي»

درين حورمتله

م. ع. آرش (الفبا)

28 مرداد ماه 1391

تبريز

+ نوشته شده در دوشنبه بیست و سوم مرداد ۱۴۰۲ ساعت 15:22 توسط سیامک آرش آزاد  |