ايستكلي نَوَهم، آيداخانيم
حميد آرشآزاد
سني گؤزهل ياراديبدير طبيعت، آيداخانيم
بهشت، اوْ حُسندن، آنجاق بير آيت، آيداخانيم
ناغيللارين پريسي، هم بهشت حوريلري
سنينجه گؤرمهميش اصلاً وجاهت، آيداخانيم
شيرينليگين، نئچه يوزمين پتهكدن آرتيقدير
هم اوْنجا دوز داغي تك وار ملاحت، آيداخانيم
گونشده، آيدا، سنه سجده ائتسهلر، يئري وار
«وُنوس» گرهك سنه ائتسين عبادت، آيداخانيم
هم ائتسه فخر سنه «فخري» طايفاسي، يئري وار
چكهر هم «آرشِ آزاد» منّت، آيداخانيم
يقين بو طايفالاري چوْخ سئويب اولو تانري
كي، سن كيمي بالا ائتميش عنايت، آيداخانيم
بوتون بو وار ـ يوْخوم، همده جانيم سنه قوربان
بو شرطايلن، اوْلا منده لياقت، آيداخانيم
هامي بيلير، سني بير «تانريجيك» كيمي سئوهرم
ولي بو اوْرتادا وار بير شكايت، آيداخانيم
گؤزهلليگي سنه بوْل وئرميش آللاه عالمده
گلهنده اخلاقا، ائتميش قناعت، آيداخانيم
دانيشديراندا، دئييرسنكي: «سنله دوست دگيلم»
بويور گؤرهك، بودو رسمِ محبّت، آيداخانيم؟!
دليل سوْراندا، دئييرسنكي: «سنده چوْخ قوْجاسان!»
نهدن قوْجا گؤرهر عالمده نفرت، آيداخانيم؟
مني قوْجالدان، اوْدوركي، سني اوشاق ياراديب
بو رسمي دونيادا قوْيموش طبيعت، آيداخانيم
تزه گليب بازارا، كيم بو كؤهنهيه باخاجاق؟
جهاندا واردير هميشه بو عادت، آيداخانيم
سني گتيردي طبيعت كي، كي سؤيلهسين منه «گئت!»
منيمده گئتمهييمه چاتدي نؤوبت، آيداخانيم
خُداكي وئردي سنه جان، منيمكيني آليري
دئيير: «تئز اوْل كي، باشا چاتدي مُهلت»، آيداخاني
بو آلتميش ايل منه بسدير، يوْرولموشام، گؤزهليم
سنه، خُدا ائده مين ايل كرامت، آيداخانيم
دئييرسن: «اوزده توكون آغ، باشيندادا آزدير»
بو بارهده مني ائتمه ملامت، آيداخانيم
باشين توكونده، جوانليق، قوْلومداكي گوجهتاي
طبيعت ائيلهدي ايللرله غارت، آيداخانيم
زمانه، انساني مين رنگايله بوْيار، عزيزي
بوْياغچيليقدا تاپيپ چوْخ مهارت، آيداخانيم
اؤزوم دگيشمهميشم رنگيمي، فلك دگيشيب
هميشه منده وارايدي صداقت، آيداخانيم
اوْلار كي رنگ عَوَض ائتدي، چاتيب پولا، مقاما
منه فقط يئتيشيب فقر، زحمت، آيداخانيم
بير عؤمر اهل ـ عياليم، هم اؤزوم قاليب يوْخسول
جهاندا دايمي چكديك اذيّت، آيداخانيم
دئدين: «كادو آز آليبسان، اوْدوركي دوست دگيلم»
بو فقره كاش گله ميليونجا لعنت، آيداخانيم
بو رسمي كيم قوْيوب عالمدهكي، عزيزلرده
محبّته آلا بير بوْللو رشوهت، آيداخانيم؟!
بئش ايل اوْلوركي، منه بير اؤپوشده وئرميرسن
دوْداقلاريم اوزونه قالدي حسرت، آيداخانيم
سن حقليسن، گؤزهليم، چونكي سيگارين قوْخوسو
تؤرهلدير انسان اوچون بوْللو نفرت، آيداخانيم
دئيهنده «پيس باباجون»، اينجيمز اورهك سندن
من ائتمهرم بو سؤزوندهن شكايت، آيداخانيم
گيلئيليگي بيتيرهك گل، «بلاچه»، «شيطانچا»!
سنينله كوسمهگه يوْخ منده طاقت، آيداخانيم
گؤزهللرين گؤزهلي! ايستهگيم بودور دايم
اوزون بير عؤمرون اوْلا، چوْخدا راحت، آيداخانيم
گلينليگين گؤرهم، آغ پالتار، آغدا بختين اوْلا
نصيب اوْلا سنه هر جور سعادت، آيداخانيم
يوز اللي ايل عؤمورون، بختهورليگايله كئچه
ايشين هميشه اوْلا عيش ـ عشرت، آيداخانيم
اوزون اوْلا بوْيون، هم بختين، همدهكي عؤمرون
باهار، ياشيلليق اوْلا همده قسمت، آيداخانيم
گلهنده اوْرتايا «آرش» سؤزو، گولومسهيهرك
ياواشجا بير اوْنادا ايسته رحمت، آيداخانيم
****************************************************************************
مبارك اوْلسون
بير ناز بالاسان، گولكيمي گؤيچهك، آيدا
هئچ گول اوْلاماز گؤزهل سنين تك، آيدا
ياز تك بزهدين پاييزدا سن دونياميزي
اوْلسون بو دوْغوم گونون مبارك، آيدا
***
گوللر اوْلاماز سنكيمي الوان، آي قيز
تانري سني ائتميش بيزه احسان، آي قيز
باشدان- آياغا، حوري- مَلَكسن، سؤز يوْخ
اخلاقدا شولوق، بير آز دا شيطان، آي قيز
***
گلميشدي ايگيرمي آلتيگون «آذر»دن
بير پايدا بيزه وئريلدي خوْش اختردن
بير كؤرپه مارال گلديكي، نازلي باخيشي
اوْلموش بيز اوچون دگرلي مين گؤوهردن
***
سن، نازلي مارالسان، قوزو جئيران، آيدا
هر خوْش گولوشون دردلره درمان، آيدا
گلديكده، بيزه باغيشلاييبسان يئني جان
تايسيز بالاسان، جان سنه قوربان، آيدا
***
«سوْلماز» باغينا، گؤزهل گول اوْلدون، گؤزهليم
«رامين» حياتيندا سونبول اوْلدون، گؤزهليم
شن نغمه، شيرين سؤزه ديل آچدين، آيدا
خوْش ماهنيلي- سؤزلو، بولبول اوْلدون، گؤزهليم
***
هر بير گولوشون، گول يارادير مين خوْنچا
جنّتدهده يوْخدو سن گؤزهل تك غوْنچا
شادليق گونو، شن بايراميميزدير، آيدا
اوْينا، بيزه روح باغيشلا، آي شيطانچا
***
«فخري» حياتيندا، پارلادين اوْلدوز تك
«آرش» كاميني دادلي ائديبسن دوز تك
آذر آييني، مين اوچ يوز هشتاد ايكيدن
بايرام ائدهرك، خوْش بزهدين نؤوروز تك
شعر ملمع قاچ چاي- قند آل! شعر طنز حمید آرش آزاد...
ما را در سایت شعر ملمع قاچ چاي- قند آل! شعر طنز حمید آرش آزاد دنبال می کنید
برچسب : نویسنده : okhtai بازدید : 148 تاريخ : شنبه 15 دی 1397 ساعت: 13:11