چون چيخار چوْخ- چوْخ اوْلوبدور من اوچون، آز دا گلير
او ْدو بير عؤمر قارين آج قاليب، اللرده خمير
قبريمين توْرپاغي گؤردون شوْرا قوْيموش، قيناما
گئجه- گوندوز خوْرهك اوْلموش منه شوْر، كؤهنه پنير
آلتميش عؤمر ائلهديم، دونيا بئزيكديردي مني
واي يازيق خضرهكي، اوْلموش ابدي عؤمره اسير
هئي جان آتديم اؤزومه منده چؤرهك پاپماق اوچون
چون مايا اوْلمادي الده، چؤرهييم اوْلدو فطير
ياشاييش بوردا ائله سيخدي، سويوم چيخدي منيم
بوندان آرتيقدا دئييرلر سيخاجاق بيرده قبير
دؤيدولر دونيادا، بيلديكلريمين خاطرينه
دؤيهجك قبردهده، بيلمهمك اوستونده، نكير
قوْرخورام بنده، جهنمدهده مستأجر اوْلام
بلكه مسكن ايشينه، اوْردادا وار چوْخلو وزير
حوري يوْخ، هئچ منه اؤز آرواديمي وئرمزلر
چونكي يوْخسوللوق ائديبدير اوْنو مندن دلگير
بيرينينده يئري جنّتده اوْلار يوزمين قصر
حوري- غلمانلا اوْتاقلار دوْلاجاق دير بير- بير
ساخسي قابدا منه «زقّوم» وئرهجكدير شكسيز
اوْنا دا بير چيني بوْشقاب دوْلو زيتون- انجير
«حافظ» آچميش سؤزو «مئي»دن، دانيشيب «مُيئخانا»-دان
بئله سؤزلر، اوْلونور ايندي «حقيقت» تفسير
من «حقيقت» ائدهرك قصد، دئسهم بير حق سؤز
اوْنو «مئي» تفسير ائديب تئزجه يازارلار تعزير
نه بو دونيان آباد اوْلموش، نه اوْ دونيان، «آرش»
كاشكي، شعرين يئرينه، سنده اوْلايدي تزوير
شعر ملمع قاچ چاي- قند آل! شعر طنز حمید آرش آزاد...
ما را در سایت شعر ملمع قاچ چاي- قند آل! شعر طنز حمید آرش آزاد دنبال می کنید
برچسب : نویسنده : okhtai بازدید : 124 تاريخ : شنبه 15 دی 1397 ساعت: 13:11