قيش گلدي، يئل كوفولدايير، هردهنده قار گلير
پولسوزلارين ايشين ائدهرك آه- زار، گلير
وار سيل آليبدير آجيلين، هم چيلله قارپيزين
يوْخسول، بادمجان آلماغادا شرمسار گلير
دؤولتلييه، گلين- كورهكن، قيز- اوْغول گلهر
پولسوز ائوينده كندلي قوْناق بئش قاطار گلير
آي بختهور كاسيب! چال، اوْخو، اوْينا، گول، دانيش
شانسين دوروبدور آلچي، سنه بخت، يار گلير
باخ ساغ- سوْلا، قاباق- دالي يا، هم يئره- گؤيه
گؤر هر دقيقهده، نئچه ميليون شعار گلير
سوفراندا نفته باخ، كاسا- بوشقاب دوْلوب- داشير
غم- غُصّهني بوراخ گئده، بوْللو زومار گلير
«يارانه»لر اوْلاندا «هدفمند»، «نقدي» پول
بيردن گؤرهرسن اوْندادا سايسيز دوْلار گلير
چوْخدا قناعت ائتمه، داداش! خرجله پوللاري
پول خرجلهمكله، هر بشره اعتبار گلير
بير پوْنزا پاخلا آل، ايكي مثقالدا لب- لبي
آرواد- اوشاق دئسين: «ائوه بير تاجدار گلير»!
مئيوه دوشرسه كؤنلونه، هئچ يوْخدو غصّهسي
«چين»دن دؤيونجا ايگده، سالادليق خيار گلير
آچ، باخ هميشه، «تئلويزيون» گورنه حال وئریر
«رازِ بقا»- ده، قارغا گئدير، سوسمار گلير
سئريالدا گؤرجهيين «كوره»- لي قهرمانلاري
گؤيدن غرور ياغير بيزه، مين افتخار گلير
«آرش»! نفس بو شاختادا، قيشدا، چوْخ حال وئرير
چون تكجه قيشدا بيزلره آزجا بُخار گلير!
شعر ملمع قاچ چاي- قند آل! شعر طنز حمید آرش آزاد...
ما را در سایت شعر ملمع قاچ چاي- قند آل! شعر طنز حمید آرش آزاد دنبال می کنید
برچسب : نویسنده : okhtai بازدید : 4 تاريخ : جمعه 25 خرداد 1403 ساعت: 14:32